admin | 怀旧特辑
上深圳除咗行商場同食嘢，其實仲有超多好玩嘅扭蛋機同夾公仔店，無論你係扭蛋控定夾公仔高手，一定搵到心水！小編精選咗深圳9大人氣扭蛋夾公仔熱點，部分仲有職員幫手擺公仔，增加成功率～即刻睇吓有邊幾間啦！
圖片來源：小紅書 @祁胤、小紅書 @酷酷夹娃练习生、小紅書 @大赢家娃娃城红山6979、小紅書 @皮蛋媽與小皮蛋、小紅書 @Safariyeh、小紅書 @爱龙华、小紅書 @Crystal、小紅書 @星际传奇绒绒家族 | 撰文：Icy
深圳扭蛋夾公仔熱點 | 1. BitCity扭扭城
2024年9月開張嘅BitCity扭扭城，有多達1400多部扭蛋機，係深圳最大型嘅扭蛋城，令人好似置身日本秋葉原咁！扭蛋價格基本只需人民幣￥20至￥35，涵蓋逾80款人氣動漫角色，包括超人氣嘅Chiikawa、Sanrio、海賊王、鬼滅之刃、葬送的芙莉蓮、守護甜心、哈利波特等等～另外仲有小眾搞怪嘅扭蛋款式，例如植物、食物、動物、昆蟲、文具！
全場擁有達1400部扭蛋機！（圖片來源：小紅書 @祁胤）
扭蛋價格比香港平好多（圖片來源：小紅書 @祁胤）
扭蛋款式涵蓋逾80個角色（圖片來源：小紅書 @祁胤）
古靈精怪嘅扭蛋款式（圖片來源：小紅書 @祁胤）
【INFO】
BitCity扭扭城
地址：深圳福田區福華一路1號大中華BitCity次元小鎮G層
營業時間：毎日10:00-22:00
交通：深圳地鐵1號線會展中心站A出口
深圳扭蛋夾公仔熱點 | 2. 小鹿的屋
位於歡樂港灣嘅小鹿的屋，場內有多部夾公仔及盲盒機，涵蓋多款人氣卡通角色，例如潦草小狗、Chiikawa、Sanrio、蠟筆小新、海賊王、迪士尼等等。40枚代幣套餐只需人民幣￥19.9，如果夾到嘅公仔唔啱心水，可以儲積分，兌換其他獎品～
大家可以儲積分兌換精美禮品～（圖片來源：小紅書 @酷酷夹娃练习生）
夾公仔機上面貼有教學，唔使驚唔識操作（圖片來源：小紅書 @酷酷夹娃练习生）
現場仲會販售正版卡通周邊（圖片來源：小紅書 @酷酷夹娃练习生）
【INFO】
小鹿的屋
地址：深圳寶安區歡樂港灣2號B1-017
營業時間：毎日10:00-22:00
交通：深圳地鐵5號線寶華站A1出口
深圳扭蛋夾公仔熱點 | 3. 大贏家娃娃機城
位於紅山嘅大贏家娃娃機城，每局只需人民幣￥2。現場會有職員幫手擺放公仔，如果夾到嘅公仔唔啱心水，亦可以選擇兌換其他小禮品。場內仲設有甩爪機及內丟機，適合鍾意向難度挑戰嘅玩家～
夾公仔機內有勁多款得意公仔任你夾（圖片來源：小紅書 @大赢家娃娃城红山6979）
仲有大量人氣爆棚嘅模型景品（圖片來源：小紅書 @大赢家娃娃城红山6979）
【INFO】
大贏家娃娃機城
地址：深圳龍華區紅山6979商業中心負1樓
營業時間：毎日10:00-22:00
交通：深圳地鐵4號線紅山站D2出口
深圳扭蛋夾公仔熱點 | 4. 佳嘰Jargee
位於卓悅中心嘅佳嘰Jargee，雖然店內冇咁多出名嘅動漫角色公仔，而係主打自家原創公仔，但款式獨特可愛，而且命中率頗高，包大家可以滿載而歸～60枚代幣套餐大概為人民幣￥50，每局只需2個代幣，相當便宜。
自創公仔嘅質素都唔錯～（圖片來源：小紅書 @皮蛋媽與小皮蛋）
大家可以放膽要求店員幫手擺位～（圖片來源：小紅書 @皮蛋媽與小皮蛋）
【INFO】
佳嘰Jargee
地址：深圳福田區卓悅中心西區B217號
營業時間：毎日10:00-22:00
交通：深圳地鐵1號線崗廈站B出口
深圳扭蛋夾公仔熱點 | 5. 柿柿喜物
柿柿喜物結合潮玩零售及夾公仔模式，除咗售賣人氣正版動漫IP產品，包括盲盒、手辦、毛公仔等等，仲可以玩擲彩虹換獎品，以及自己落手夾公仔，增加成功感。現場會有職員駐守，幫手擺好公仔位置，等大家更容易夾到心頭好！
店內有多款聯名角色周邊（圖片來源：小紅書 @Safariyeh）
每部公仔機右上角會標註夾中獲得嘅積分，儲夠一定積分就可以兌換小禮品（圖片來源：小紅書 @Safariyeh）
大部分公仔機每局只需一枚代幣（圖片來源：小紅書 @Safariyeh）
店內公仔都係正版動漫IP產品（圖片來源：小紅書 @Safariyeh）
【INFO】
柿柿喜物
地址：深圳福田區中航城君尚B1層G56–58號
營業時間：毎日10:00-22:00
交通：深圳地鐵1號線華強路站B出口
深圳扭蛋夾公仔熱點 | 6. 朗玩
位於龍華區壹方天地嘅朗玩係一個大型室內遊樂場，總共有四層，一票可全日任玩碰碰車、牛仔競技、射擊、彈彈床、籃球等設施。而每層都設有多部正版授權嘅夾公仔機，主打日本動漫公仔及盲盒，每局只需一枚代幣，性價比超高！
朗玩全店共有四層，玩足全日都得！（圖片來源：小紅書 @爱龙华）
每局只需一枚代幣，抵玩又放心（圖片來源：小紅書 @爱龙华）
夾公仔機全部都係正版授權（圖片來源：小紅書 @爱龙华）
【INFO】
朗玩
地址：深圳龍華區人民路壹方天地C區1至4層
營業時間：毎日10:00-02:00
交通：深圳地鐵4號線龍華站A出口
深圳扭蛋夾公仔熱點 | 7. catch uuu
位於領展中心城嘅catch uuu，唔單止公仔機嘅爪夠實淨，店員仲非常友善，會主動幫手擺放公仔位置，令成功率大大提升，深受內地網民歡迎。店舖設有「保底」服務，若使用一定金額嘅代幣仍未夾中公仔，店員就會即場送一隻，適合新手同小朋友試手氣～
夾公仔每局只需2枚代幣（圖片來源：小紅書 @皮蛋媽與小皮蛋）
店舖設有「保底」服務，啱晒新手（圖片來源：小紅書 @皮蛋媽與小皮蛋）
【INFO】
catch uuu
地址：深圳福田區皇庭廣場B1層63A號舖
營業時間：毎日10:00-22:00
交通：深圳地鐵4號線會展中心站C出口
深圳扭蛋夾公仔熱點 | 8. 熱氣球
同樣位於領展中心城嘅熱氣球，同樣人氣爆燈，店內擁有約30部公仔機，主打Chiikawa、Sanrio、迪士尼、排球少年等熱門動漫IP角色。部分公仔機更設有「保底」服務，玩家累積一定數量嘅小公仔後，就可兌換大公仔，確保大家都能夠夾到心頭好～
夾中公仔就可以獲得一定積分（圖片來源：小紅書 @Crystal）
店內最受歡迎莫過於Chiikawa！（圖片來源：小紅書 @Crystal）
仲有好多得意嘅公仔款式（圖片來源：小紅書 @Crystal）
【INFO】
熱氣球
地址：深圳福田區領展中心城G層RG073A號舖
營業時間：毎日10:00-22:00
交通：深圳地鐵4號線會展中心站B出口
深圳扭蛋夾公仔熱點 | 9. 星際傳奇扭扭街區
位於深圳地鐵紅樹灣南站附近嘅星際傳奇扭扭街區，擁有達400部扭蛋機，主打排球少年、寵物小精靈、柯南、Sanrio、蠟筆小新、角落生物等人氣動漫卡通人物，價格大概為人民幣￥20至￥35之間，深受二次元及潮玩愛好者歡迎！
地鐵通道沿路都會有多部扭蛋機（圖片來源：小紅書 @星际传奇绒绒家族）
扭蛋價格大概為人民幣￥20至￥35之間（圖片來源：小紅書 @星际传奇绒绒家族）
場內仲設有一排彈珠機（圖片來源：小紅書 @星际传奇绒绒家族）
【INFO】
星際傳奇扭扭街區
地址：深圳南山區紅樹灣南地鐵站附近
營業時間：每日 10:00–22:00
交通：深圳地鐵9或11號線紅樹灣南站B或E出口
——————————————————
Follow 我哋睇更多最新情報！
Facebook – SAUCE – 為生活加一點味道
Instagram – @sauce.media.hk
YouTube – @saucemediahk
Tags :
夾公仔好去處深圳好去處扭蛋打卡打卡好去處玩樂好去處親子好去處週末好去處sauce旅遊sauce生活sauce焦點SAUCE熱話SAUCE玩樂
Icy Tsoi
07/25/2025